A delegada territorial da Xunta en Ferrol, Martina Aneiros, acompañada do alcalde de Neda, Ángel Alvariño, e da xefa territorial da Consellería de Promoción do Emprego e Igualdade, Judit Fontenla, coñeceu esta mañá ás dúas mulleres contratadas polo Concello con cargo ao programa Aprol Rural para acometer traballos relacionados, na súa maioría, coa prevención de incendios.

As persoas contratadas gracias a un apoio económico de 28.000 euros encárganse de labores de limpeza viaria, parques e espazos públicos, así como traballos vinculados coa prevención de incendios.

Neda é un dos 15 municipios das comarcas de Ferrol, Eume e Ortegal beneficiarios da convocatoria de 2022 deste programa da Xunta dirixido aos municipios rurais. En total, a Xunta sufragou a contratación de 20 traballadores cun investimento de preto de 280.000 euros.

“Desta forma o Goberno galego proporciona ás persoas desempregadas a experiencia e a práctica profesional necesarias para facilitar a súa inserción laboral, ao tempo colabora na prestación de servizos municipais”, destacou a delegada territorial.

Martina Aneiros lembrou que ata o 1 de marzo está aberta a convocatoria deste ano que conta cun orzamento de 7M€ para a contratación de 500 persoas desempregadas en municipios do rural galego. Os apoios incluirán a contía de todos os custos salariais por cada persoa contratada, segundo o convenio colectivo vixente. Os importes das axudas poderán aumentar nun 15% en caso de que as contratación sexan para a realización dun traballo solicitado conxuntamente por varios Concellos.