O Diario Oficial de Galicia (DOG) publica hoxe a orde da Consellería de Emprego, Comercio e Emigración que neste 2024 impulsará o financiamento de accións formativas a demanda do tecido produtivo galego e dirixidas a persoas traballadoras ocupadas. Cun orzamento de 4 millóns de euros, trátase da primeira vez que se pon en marcha esta iniciativa, a través da cal a Xunta avanza no seu compromiso firme coas microformacións como unha ferramenta estratéxica clave para atender as necesidades das empresas, incrementar as oportunidades das persoas traballadoras, ofrecer solucións efectivas inmediatas para cubrir as vacantes laborais e facilitar as transicións profesionais nos sectores con maior impacto e futuro do mercado.

A convocatoria dálle un novo pulo á aposta polas experiencias curtas de aprendizaxe, xa que ademais de incentivar a obtención de certificados profesionais (grao C), contempla tamén de xeito decisivo as formacións de curta duración (grao B, certificados de competencia) e mesmo as microformacións (grao A, acreditacións parcial de competencia) co obxectivo de  garantir -sen rixidez e de xeito áxil e inmediato- a adquisición de novos coñecementos requiridos polas empresas galegas. Isto permitirá reforzar a capacitación dos seus traballadores fomentando o seu crecemento profesional e cubrir os perfís relacionados coas competencias e habilidades máis demandadas polo tecido empresarial.

A flexibilización da formación é un eixo estrutural do Goberno autonómico galego na súa política de emprego, aliñada co sistema de microcredenciais polo que avoga Europa, como un instrumento fundamental para fomentar máis e mellor emprego de calidade, así como para dar resposta a grandes retos como a adecuación da oferta e da demanda.

Así, grazas a esta convocatoria, unha empresa poderá solicitar, segundo as súas necesidades, unha formación ampla de grao C -de ata 1.000 horas- nun determinado ámbito, podendo fragmentar de xeito máis cirúrxico a súa demanda, optando só por un módulo de entre 200 e 300 horas (grao B) ou mesmo por un bloque concreto incluído nese mesmo módulo, en torno ás 30 ou 40 horas (grao A). Por exemplo, unha entidade do sector TIC poderá requirir para os seus traballadores -a través das entidades e centros de formación acreditados- unha formación específica sobre instalación e mantemento de sistemas domóticos (grao B) ou acotalo aínda máis a unha microacreditación centrada exclusivamente en conectividade dun proxecto destas características (grao A); ou unha compañía do sector naval, demandar un curso sobre documentación técnica para construción e reparación naval ou centrarse unicamente no módulo de deseño 2D e 3D.