A Consellería de Promoción do Emprego e Igualdade mantén aberta ata o 16 de setembro a convocatoria anual das axudas Aprol Economía Social, hoxe publicada no DOG, que inclúe apoios ao emprego en cooperativas e sociedades laborais por valor de 5 millóns de euros. Con esta iniciativa, a Administración autonómica espera beneficiar unhas 175 entidades.  

A liña conta con 5 millóns de euros de orzamento, un 16% máis que en 2023, para fomentar o emprendemento e o emprego na economía social.

O programa conta con dúas liñas compatibles entre si: unha primeira con axudas directas a cooperativas e sociedades laborais para que incorporen, sobre todo, persoas desempregadas; e unha segunda, para beneficiar a quen entre como socia ou traballadora indefinida a unha destas entidades ou ben inicie a súa actividade por conta propia. Neste último caso, os apoios son compatibles co resto de liñas de impulso do traballo por conta propia que promove a Consellería de Promoción do Emprego e Igualdade.

A contía básica da axuda en cada unha das liñas ascende a 6.000 euros, con incrementos acumulables do 25% se se trata de mulleres, persoas con discapacidade, maiores de 45 anos, emigrantes retornados ou que as entidades se ubiquen en contornas rurais ou sexan cooperativas xuvenís.

A orde prevé desde o ano pasado que ese 25% extra se aplique no caso de cooperativas de nova creación que conten con 4 ou máis socios.

A Xunta de Galicia calcula incentivos máximos de ata 19.500 euros de acumularse algunha destas variables para ambas as dúas liñas.

O DOG publica hoxe tamén a resolución da convocatoria 2023 destes apoios que beneficiaron a 498 persoas e supuxeron un investimento de 5,1 millóns de euros.