Trasladado ao ámbito laboral e en liña co indicado, estar ben nun traballo require de alcanzar o equilibrio entre todos eses aspectos que conflúen nos ambientes profesionais: soldos e prestacións, liderado e supervisión, comunicación, ferramentas de traballo, condicións de traballo, formación e capacitación continua, integración do individuo e recoñecemento, traballo en equipo, conciliación familiar, coidados e confianza, etc.

O nivel de satisfacción ou insatisfacción, relacionado con todos estes aspectos, conforma a contorna laboral que por tanto se desenvolve mantendo no centro a persoa, posto que unha empresa non é máis que un conxunto de persoas interactuando.

Tomando como base este concepto, hai que entender que se o lugar de traballo non é un lugar feliz, a satisfacción persoal decrece e con ela o rendemento persoal e profesional do individuo.

O benestar laboral é un concepto que integra todo o que se fai para a comodidade e a mellora dos/as empregados/as por riba do aspecto salarial e que se basea na relación existente entre a produtividade e a felicidade. Inicialmente pode supoñer un gasto extra que, se se realiza de forma adecuada, obterá maiores beneficios.

Cando un/unha empregado/a sente que a empresa se preocupa polo seu benestar, vincúlase ao proceso produtivo desde unha implicación maior e unha preocupación por acadar os resultados. Xérase unha complicidade e capacidade de compromiso que unifica criterios, achegando unha mirada conxunta cara a obxectivos comúns. Introducir melloras laborais implica fomentar a satisfacción que vai unida de forma unilateral á creatividade e capacidade de innovación das persoas.

A diferenza entre unha organización que simplemente funciona e outra que destaca polo seu rendemento e produtividade é que a felicidade do conxunto de traballadores/as a se dispón en paralelo aos retos perseguidos, logrando desta maneira un éxito cooperativo, resultado dese impulso simultáneo entre saúde e produción.