O conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, visitou esta mañá en Viveiro, xunto coa alcaldesa, Mariña Gueimunde, e o presidente da Federación de Comercio, José María Seijas, o mercado municipal e o establecemento tradicional de ultramarinos e vinoteca Casa Chao, onde puxo de relevo os apoios da Xunta a estes establecementos comerciais e que se enmarcan no Plan estratéxico do comercio de Galicia 2025-2030. Entre eles, a nova orde de axudas para o comercio de preto de 4 M€ — que abriu onte o prazo de solicitudes— e as achegas para potenciar as prazas de abastos, das que proximamente se lanzará unha nova edición.

En relación cos apoios a prol da competitividade do sector comercial e artesanal, especificou que a eles tamén poden optar as praceiras e praceiros. En concreto, a orde abarca tres liñas compatibles entre si, que son dixitalización e innovación comercial, modernización e sustentabilidade ambiental e con elas apóiase ao sector na adaptación ás tendencias de consumo coa introdución de tecnoloxías, acondicionamento dos locais comerciais, na mellora dos equipamentos, así como no compromiso ambiental.

Neste sentido, sinalou que o ano pasado na provincia de Lugo obtiveron este tipo de axudas 102 comercios e 10 obradoiros artesáns por un valor de 676.600 euros e que mobilizaron un investimento de preto de 846.000 euros.

Ademais, José González destacou algunhas novidades que incorpora esta convocatoria como a ampliación do período subvencionable, sendo desde o 25 de outubro de 2025. Tamén promove a simplicación administrativa e axilizarase o procedemento de concesión e pagamentos anticipados. Neste sentido, animou aos comerciantes a acollerse a estes apoios que favorecen a competitividade do sector.

Con eles, subliñou, buscamos impulsar a innovación mantendo ao mesmo tempo a tradición, unha esencia pola que se caracterizan negocios familiares como Casa Chao, que tamén poden optar a estas axudas. Ademais, no caso concreto deste negocio de Viveiro, destacou a súa gran traxectoria, con máis de 90 anos de actividade ininterrompida e sinalou que pertence a Viveiro Centro Comercial Histórico, entidade recoñecida nos Premios Comercio Galego 2025 na categoría de dinamización comercial. Tamén, recoñeceu, tanto deste establecemento como da praza de abastos de Viveiro, a súa capacidade de adaptación ás transformacións do comercio mantendo a súa identidade. A estas visitas sumáronse outras realizadas tamén hoxe aos establecementos Albo e La Vivariense.