O secretario xeral de Emprego e Relacións Laborais, Pablo Fernández, participou esta tarde na presentación do taller Os riscos psicosociais e a súa relación coas accións de conciliación, no marco do campus formativo de igualdade laboral impulsado pola Xunta e coincidindo co Día Mundial da Seguridade e Saúde no Traballo que se conmemora hoxe. No Centro de Orientación ao Emprendemento con sede na Coruña, Fernández reafirmou o compromiso autonómico co benestar das persoas traballadoras sumándose ao lema da Organización Internacional do Traballo (OIT) deste ano Garantamos unha contorna psicosocial saudable no traballo. Nesa liña, destacou a Estratexia de Benestar Laboral na que está a traballar a Xunta e que se abordará no seo do Diálogo Social que se vén de institucionalizar.

Impartida pola inspectora de Traballo e Seguridade Social Sandra García Lombardía, a xornada desta tarde analiza como se pode mellorar a conciliación da vida persoal, familiar e laboral a través da prevención dos riscos psicosociais con perspectiva de xénero. Así, contémplase a análise da relación existente entre a prevención dos riscos psicosociais e a conciliación, incidindo en aspectos como a prevención dos riscos psicosociais para a consecución da igualdade de xénero, a interacción da vida persoal e familiar e o traballo, e as ferramentas ou estratexias a ter en conta para mellorar a conciliación a través da prevención dos riscos psicosociais, incluído o papel das partes empresarial e social na definición destas medidas e a tutela administrativa na materia a través da Inspección de Traballo e Seguridade Social e as prestacións de Seguridade Social.