A directora xeral de Emprendemento e Apoio ao Emprego, Margarita Ardao, participou hoxe no acto de presentación da FIRST LEGO League en Ferrol, onde destacou a aposta da Xunta polo impulso e apoio á creación e desenvolvemento de produtos e procesos innovadores no marco do movemento de emprendemento makers de Galicia.

Ardao sinalou que a FIRST LEGO League Galicia é unha mostra de como se pode formar á mocidade, axudándoa a desenvolver habilidades e competencias de emprendemento no futuro e puxo como exemplo a academia Emprende Makers que a Xunta de Galicia impulsou o pasado ano para formar en competencias básicas do emprendemento maker. É unha aposta, segundo resaltou, pola transformación dixital, a formación e o intercambio de coñecementos para favorecer a creación de empresas innovadoras impulsadas pola mocidade.

A cultura maker constitúe, segundo remarcou Ardao, un activo crucial para a sociedade e para o seu tecido empresarial e industrial, ao aportar innovación e reinventar a actividade empresarial usando tecnoloxías de fabricación dixital baixo a filosofía do “faino ti mesmo”. Na academia Makers participaron o pasado ano preto dun cento de mozas e mozos.

A directora xeral, para rematar a súa intervención, puxo en valor a Rede de polos de emprendemento e apoio ao emprego que a Xunta de Galicia está a despregar por toda a xeografía galega para apoiar os proxectos de empresa, en todas as súas etapas. Serán en total doce polos dos que cinco xa están operativos: os de Costa da Morte (en Coristanco), Rías Altas de Arco Ártabro (en Ferrol), Lugo Sur (en Monforte de Lemos), Ourense Centro e Sur (en Verín) e Pontevedra Norte e Rías Baixas (en Silleda). Nestes puntos recibiron asesoramento en 2022 un total de 151 proxectos empresariais, dos que 141 se atopan activos na actualidade, repartidos en 13 sectores de actividade.