Neste senso, a representante do Goberno autonómico  lembrou que a Xunta ten aberto o prazo da  orde de axudas 2025 para o fomento da comercialización da artesanía de Galicia da que se poden beneficiar os obradoiros artesáns inscritos no Rexistro Xeral de Artesanía de Galicia,  e os concellos e as asociacións profesionais e empresariais de artesáns/ás para promover a organización de feiras neste ámbito, e animou aos posibles beneficiarios a solicitar estas achegas antes de que remate o prazo para solicitalas.

Dos 265.000 € de orzamento cos que conta esta orde —cuxo prazo de presentación de solicitudes permanecerá aberto ata este xoves 17 de xullo— 180.000 euros están destinados aos artesáns e artesás, 50.000 aos consistorios e 35.000 ás asociacións. Con esta nova edición o Goberno galego fortalece a comercialización dos produtos da marca Artesanía de Galicia e continúa apoiando a asistencia a feiras e a súa organización atendendo á importancia deste sector en Galicia, tanto no ámbito social e cultural como no relacionado coa xeración de emprego e riqueza.

A delegada explicou que a Xunta apoia a asistencia a feiras profesionais ou feiras de venda directa, de ámbito nacional e internacional, por parte de obradoiros artesáns inscritos no Rexistro Xeral de Artesanía de Galicia, financiándolles aspectos como o alugueiro do espazo expositivo, seguros, servizos de carácter básico e obrigatorios sinalados polo regulamento das feiras, servizos de tradución e transporte profesional do material expositivo, entre outros. Os obradoiros beneficiarios poderán recibir unha subvención máxima de 8.000 euros a través de tíckets por feira que irán dos 400 euros de mínimo en feiras de venda directa aos 3.000 euros de máximo en feiras profesionais, pasando polos 1.500 euros para feiras de Nadal.

No caso dos concellos, como novidade desta convocatoria, soben as contías máximas de axuda tanto para a organización de feiras monográficas —as que son dun mesmo oficio tradicional— como non monográficas —as que inclúen distintos oficios—. Para as feiras monográficas, a cantidade máxima de apoio sobe a 18.000 euros fronte a anterior, que era de 15.000 e no caso das non monográficas poderá ser de ata  8.000 euros en función da porcentaxe de obradoiros inscritos no Rexistro Xeral de Artesanía de Galicia que participen. Ata agora as cantidade máxima podía chegar ata os 3.000 euros.

No caso das asociacións de artesáns, diríxense a aquelas nas que cando menos o 80% dos seus membros, cun mínimo de 10, figuren inscritos como obradoiros artesáns no Rexistro Xeral de Artesanía de Galicia e as achegas poden chegar aos 18.000 euros con feiras ou eventos de artesanía de máis de 30 obradoiros involucrados e tamén poden optar a apoios para manter as súas páxinas web.