O Diario Oficial de Galicia (DOG) publica hoxe, tras a autorización do Consello da Xunta da semana pasada, unha ampliación de crédito en 15 millóns de euros para as accións formativas para desempregados (AFD) na súa edición 2022-2023, polo que esta iniciativa contará en global con máis de 64,5 millóns de euros (un incremento do 45,7% con respecto a 2021-22) para a realización de preto de 1.430 cursos nos que preto de 21.700 persoas sen emprego poderán mellorar a súa cualificación.

Poden acceder a estas accións as persoas traballadoras afectadas por expedientes de regulamento temporal de emprego (ERTE), suspensións dos contratos de traballo ou por reducións de xornadas por causas económicas técnicas, organizativas ou de produción ou derivadas de forza maior; e, aínda que os cursos van dirixidos principalmente a persoas desempregadas, admítese tamén a participación de ata un 30% das persoas traballadoras ocupadas, sempre e cando esta porcentaxe non se cubra con traballadores desempregados. Poden tomar parte tamén as persoas demandantes de servizos previos ao emprego.

As alumnas e alumnos que desexen participar nestas accións poden facelo a través das oficinas de emprego, mediante solicitude ás propias entidades de formación beneficiarias da axuda autonómica e/ou directamente por medio da web https://emprego.xunta.gal.

A Administración autonómica avoga pola formación para desempregados, unhas accións que contaron nas últimas convocatorias cunha media de inserción do 60%, é dicir, que seis de cada dez persoas que toman parte nestas actuacións acceden ao mercado laboral.

Nesta convocatoria das accións formativas para persoas desempregadas (AFD) continúase a dar un pulo á teleformación e á aula virtual como modalidades de cualificación e estanse a reforzar os cursos destinados á obtención de competencias clave ou especialidades formativas conducentes á obtención de certificados de profesionalidade con validez en todo o Estado e acordes coas necesidades que demanda o tecido produtivo.

En concreto, resérvase un 10% do orzamento para o financiamento de cursos en competencias clave e un 40% para aquelas especialidades formativas con maior demanda ou con maiores perspectivas de emprego, seguindo a liña da Axenda Galega de Capacidades para o Emprego. Esta estratexia autonómica busca mellorar tanto a cualificación profesional das galegas e galegos e a competitividade das empresas. Do que se trata é de dar resposta ás necesidades daquelas galegas e galegos que precisan mellorar o seu nivel de formación e de incorporar ás empresas ao proceso formativo para dar resposta á demanda de traballo, casando oferta con demanda.