Unha vez concretado a que nos referimos cando falamos de felicidade no traballo… Pódese medir a felicidade no traballo? Como e que se mide, é dicir, que factores inflúen na percepción da felicidade no traballo?

Estamos a falar dunha percepción subxectiva, a felicidade moitas veces mídese en xeral como a escala de satisfacción coa vida, e é unha percepción. Ti podes ser Amy Winehouse ou Whitney Houston e ter un traballo que sería envexado ou desexado por outras persoas, e ser profundamente infelices. E podes desempeñar funcións laborais moito máis sinxelas, humildes, cotiás, e acadar un adecuado nivel de satisfacción.

En que se mide? Ben, en realidade como digo, é un nivel de satisfacción; trataríase de medir o satisfeito que estás co teu traballo. Mais claro, iso sería unha pregunta xeral. Hai outras que poden medir, por exemplo, en que medida te identificas cos valores da túa compañía, en que medida te sentes comprometido, se desexas permanecer moito tempo nesa compañía, se recomendarías a compañía na que ti traballas como un bo lugar para traballar a outras persoas…. En definitiva, hai moitos elementos que teñen que ver, por exemplo, coa túa relación co teu xefe ou cos teus superiores, iso é moi determinante en relación coa satisfacción laboral. O orgullo de pertenza, que xa mencionei, e tamén a relación cos teus compañeiros, a camaradería sería outro dos ámbitos que se poden ter en conta para medir o nivel de satisfacción co teu traballo. Hai outros indicadores que che din, por exemplo, cal é o nivel de absentismo; indicadores de negocio que podes comparar, se cadra, se tes outros datos no sector; unha rotación non desexada tamén sería un indicador que seguramente se correlacione inversamente co nivel de felicidade no teu traballo, entre outros.