O conselleiro de Emprego, Comercio e Emigración, José González, desgranou hoxe as medidas do Goberno galego para a creación de emprego de calidade atendendo ás necesidades do tecido produtivo e ás capacidades das persoas que buscan activamente traballo. Nesta liña, expuxo que a estratexia da Xunta para facer fronte ao reto das vacantes laborais incide na captación de talento co foco posto nas microformacións, no emprendemento e no comercio local.

Así o destacou durante o relatorio Retos do emprego en Galicia co que participou no acto polo 25º aniversario de EGA Consultores, onde felicitou a esta entidade polo seu traballo a prol dos recursos humanos, da formación para o emprego e a captación de talento.  Ademais, puxo o foco nas tres grandes áreas que marcan a folla de ruta para a atracción de talento en Galicia.

A primeira está relacionada con potenciar a empregabilidade dos demandantes reais de emprego, e neste campo o conselleiro salientou a modernización do Servizo Público de Emprego coa implantación da ferramenta tecnolóxica EMi, que sincroniza en tempo real a oferta e a demanda de emprego co apoio da intelixencia artificial e que é pioneira en España e en Europa. Nesta liña, González insistiu na necesidade de optimizar as listas do paro e destacou o programa de seguimento intensivo da demanda de emprego, que permite afinalas para que nelas estean as persoas que realmente demandan traballo.

Neste apartado tamén destacou as microformacións, coas que se define a oferta formativa da man das empresas para atender as competencias que demanda o tecido produtivo e ofrecer unha formación para o emprego eficaz e adaptada ao territorio.